პროექტის შესახებ
ჯეპრაში გვჯერა, რომ არ არსებობს ჩვეულებრივი დღე.
თითოეული დღე ჩვენი კომპანიისთვის რაღაც სიახლესთან, საუცხოო ცვლილებებთან და საინტერესო ამბავთანაა დაკავშირებული.
ყველა დღე განსხვავებული და დასამახსოვრებელი შთაბეჭდილებებითაა სავსე.
ყველა დღე - ელვარე დღესასწაულია.
კალენდრის თითოეული ფურცელი ქართველებისთვის საამაყო და, აგერ უკვე 8000 წლის განმავლობაში მშობლიურ, შთაგონების მომცემ ქართულ ღვინოს დავუკავშირეთ.
ასე შეიქმნა ჩვენი, 2017 წლის ხალისიანი წლიური ანგარიში.
განვლილი წლის რეტროსპექტივა ჩვენი თანამშრომლების, მათი გამოცდილების, მათი ყოველდღიურობის ანარეკლია. ამიტომაც, მკაცრად, ნუ განგვსჯით, როცა ღვინოსა თუ ღვინოსთან დაკავშირებული ატრიბუტების წარმოდგენას შეაფასებთ.
ღვინო ჩვენს განწყობას, შესაბამის სეზონებსა და ჩვენს, ელეგანტური სიკაშკაშით გამორჩეულ პროდუქტებს დავუკავშირეთ.
ეს არ არის ღვინის კატალოგი. აქ თითოეული ღვინო, თითოეული არტეფაქტი ჯეპრას და იმ დღის ბზინვარე დამატებაა, რომელიც დღესასწაულის დარად, ერთად გავატარეთ ჯეპრელებმა
წლიური ანგარიში სხეულიანია და გამოირჩევა პროექტების ინტენსიური არომატებით, რომელიც ჰარმონიულად ერწყმის თანამშრომლების ცხოვრების მრავალფეროვან ნოტებს ხავერდოვნად გამოხატული გენდერული ბალანსის თანხლებით.
აქვს ხანგრძლივი და საფეხუროვანი დაბოლოება ღვინოსთან დაკავშირებული შესანიშნავი ისტორიული არტეფაქტებისა და ფიროსმანის გენიალური დასურათებული კომპოზიციების სახით.
ხასიათდება ცოცხალი და ხალასი გემოთი, გაწონასწორებული, ჯიშური, ჯეპრას პროდუქტებისთვის დამახასიათებელი ტანინებით და მდგრადი გაგრძელებით - კლიენტების კმაყოფილების სახით.
დამშვენებულია კონსტანტინე გამსახურდიას “დიდოსტატის მარჯვენა”-ში ნახსენები 73 მისტიკური ფერის ბუკეტით.
დამზადებულია ტრადიციული ქართული წესით, „აკადემქალაქის“ განსაკუთრებულ მიკროზონაში, ზღვის დონიდან 447 მეტრ სიმაღლეზე დაკრეფილი იდეების 9 თვიანი დავარგებით.
დაგემოვნებისას იგრძნობთ 15 წლიანი დაძველებისა და უმწიკვლო რეპუტაციის ნიშნებს და ევროპული კომპანიის ანალოგიური გამოცემის მკვეთრად გამოხატულ პიკანტურ ტონებს.
მიირთვით თანმიმდევრულად, თარიღების მიხედვით მზიდან მიღებული ენერგიის თანხლებით.
შინაარსი და თემატიკა: ნინანო დავითაია
ღვინისა და არტეფაქტების თემატური განყოფილება: ნუნუკა ნებურიშვილი
დიზაინი: მარიამ მურადაშვილი, თაკო ჩიხრაძე, გეგი ბოლქვაძე, მაშკა წულეისკირი
პროექტის მართვა: ეკატერინე ჟვანია, ნუნუკა ნებურიშვილი
ვებ-უზრუნველყოფა: intellect LTD
ვებ-დიზაინი: intellect LTD
ჯეპრა, 2017