აი, მედიცინა

ხელოვნური ინტელექტის მედიცინაში გამოყენება სამ ნაწილად იყოფა – პრევენცია, დიაგნოსტიკა და მკურნალობა. დიაგნოსტიკაში AI-ის შეუძლია ექიმის ასისტენტი იყოს და მას სწორი დიაგნოზის პოვნაში დაეხმაროს – ეს შეიძლება იყოს ChatGPT Health-თან კონსულტაცია და კონსილიუმის ფუნქციის შესრულება და რადიოლოგის მიერ AI-ის გამოყენებით ტომოგრაფიის შეფასება. AI-ის მთავარი ღირებულება არის მეტი სიზუსტე კვლევების შემთხვევაში (რენტგენი, ტომოგრაფია, ლაბორატორიული კვლევები) და მეტი ინფორმაცია – მეორე აზრი, რომელიც ძალიან კომპეტენტურ ექიმს შეიძლება გამორჩეს.

საქართველოში ექიმების ნაწილმა დაიწყო გენერაციული AI-ის გამოყენება და მას იყენებენ როგორც ინფორმაციისა წყაროს, კოლეგას, რომელსაც ბევრი ინფორმაცია აქვს და სწორი კითხვების დასმა შეუძლია. მეორე მხრივ, წამყვან ქართულ კლინიკებში ინერგება სამედიცინო აპარატურა AI ფუნქციონალით, რომელიც, მაგალითად, რადიოლოგებს ან დერმატოლოგებს ეხმარება უკეთ შეფასებასა და უფრო სწორი დიაგნოზების დასმაში.

ექიმისთვის AI ყოველთვის დამხმარე ინსტრუმენტი უნდა იყოს, რომელიც მას მეტ სიზუსტეს, დამატებით ინფორმაციას ან ალტერნატიულ აზრს შესთავაზებს. ასევე, დაეხმარება ადმინისტრაციული საქმეების გამარტივებაში, როგორიცაა პაციენტის ისტორიაზე მუშაობა, და მეტ დროს დაუტოვებს თავისი ძირითადი საქმისთვის. მაგალითად, რამდენიმე კლინიკაში უკვე მიმდინარეობს ქართული პროდუქტის პილოტირება, რომელიც სამედიცინო ისტორიებს კარნახით წერს – ექიმი და პაციენტი ლაპარაკობენ, AI სისტემა კი ამ საუბარს სამედიცინო ისტორიაში ასახავს.

დიაგნოსტიკის შემთხვევაშიც, ექიმისთვის AI არის ცოდნის და ინფორმაციის შევსების საშუალება. ექიმმა შეიძლება ენის მოდელს ჰკითხოს, როგორია გარკვეულ სიტუაციაში სწორი სამედიცინო პროტოკოლი, მოდელის შეთავაზებული კვლევებიდან ან გზებიდან კი გადაწყვიტოს, რომელია მისი პაციენტისთვის შესაბამისი. ზოგჯერ ექიმს შეიძლება გამორჩეს დიაგნოსტიკის ან მკურნალობის სწორი მეთოდი ან სიმპტომებიდან ვერ დაადგინოს პრობლემა. ასეთ შემთხვევაში, მაგალითად, ChatGPT არის კოლეგა, რომელსაც აქვს ბევრი ინფორმაცია და შეუძლია ექიმს სხვადასხვა ვარიანტები „შეახსენოს“. საბოლოო გადაწყვეტილება და, რაც მთავარია, პასუხისმგებლობა მაინც ექიმზე რჩება.

რამდენიმე თვის წინ საქართველოში ასეთი შემთხვევა იყო, როცა რამდენიმე ექიმმა ვერ შეძლო ბავშვისთვის სწორი დიაგნოზის დასმა. ChatGPT-მ კი სიმპტომების აღწერისა და დამაზუსტებელი კითხვების დასმის შემდეგ, სწორი დიაგნოზი დასვა.