ამაზე სწორი პასუხის თქმა ყველაზე რთულია, რადგან მოთხოვნადი უნარები და ადამიანების აზრი მოთხოვნად უნარებზე სწრაფად იცვლება.
რაც არ იცვლება არის ის, რომ ადამიანებს სჭირდებათ ორი მთავარი უნარი – სიახლეებთან სწრაფად ადაპტირების და სწავლის და კრიტიკული, სისტემური აზროვნების უნარები. ეს ნიშნავს, რომ არაა აუცილებელი, ახალგაზრდამ ისწავლოს ერთი კონკრეტული პროდუქტის ან პროგრამის გამოყენება ძალიან კარგად, რომელიც შეიძლება მალევე შეიცვალოს ან გამარტივდეს. მთავარია, მან იცოდეს, რა დგას ამ პროდუქტის უკან, როგორ გამოიყენოს კონკრეტული ამოცანის ან რეალური პრობლემის გადასაწყვეტად. ხოლო როცა ახალი ინსტრუმენტი, პროგრამა ან პროდუქტი გამოჩნდება, სწრაფად ისწავლოს მისი გამოყენება.
სისტემური აზროვნება და პასუხის გაცემა კითხვებზე „რა უნდა გადავწყვიტოთ? ვისთვის? როგორ?“ არის უნარი, რომელიც უფრო და უფრო ღირებული გახდება.
მეორე მხრივ, მნიშვნელოვანია ფუნდამენტურ მეცნიერებებში ექსპერტიზის ქონაც, მაგალითად, ბიოლოგიაში, ქიმიაში, ფიზიკასა თუ მათემატიკაში. ხელოვნური ინტელექტი ამ დისციპლინებს გააძლიერებს და აღმოჩენებს აასწრაფებს, მაგრამ, ამ პროცესში ადამიანების როლი მაინც წამყვანი იქნება.
პრაქტიკულად საჭირო უნარებია – AI პროდუქტების სწორად გამოყენება (პრომპტ/კონტექსტ ინჟინერია, საკუთარი ავტომატიზაციების/აგენტების შექმნა, სხვადასხვა პროდუქტების შესაძლებლობების ცოდნა), პროფესიული AI პროდუქტების შესახებ ცოდნა და სიახლეების მუდმივად მიყოლა (რა არსებობს და გამოიყენება ფინანსებში, განათლებაში, დიზაინში და ა.შ.) და AI სისტემების მუშაობის საბაზისო პრინციპების ცოდნა მისი შეზღუდვების გასაგებად (რას შეიძლება ვენდო, რატომ შეიძლება AI-ის შეეშალოს).
